小城飮食消費貴 鄰埠酒樓似更抵

　　低質侍應嘴藐藐 老闆激到生蝦跳

　　在港與車界朋友飯聚，感覺與別不同，非論菜色，只講招呼，澳門拍馬追唔上。

　　酒家位處中環，午市例爆。甫入內，知客笑臉相迎，侍應招呼周到，頗有賓至如歸之感。

　　向來食嘢少睇價，惟酒家Menu幾疊，引起注意。一睇，嘩，無論筵席、小菜抑或套餐都不貴，人家級數不差，旺區捱貴租，又有好服務，雀局更抵玩，竟然平過澳門同級酒樓。

　　有人話，為食一族在小城開始“冇定企”（除識熟人），食肆出品每況愈下，顧客受氣，服務水準低到得人驚，有些侍應見身郁唔見米白，出品程序亂籠；部分態度差，幫老闆搗米。同相熟老細講起，佢話唔激到嘔血已好彩矣。

　　早十年八載，總覺澳門酒樓點心出品用心，稍勝香港（同級比較），很多鄰埠朋友有同感。然而近年來，澳門部分酒家、酒樓出品倒退，有人更話食水深，加價毋須通知。

　　在商言商，食肆冇理由做蝕本生意，但今時今日，做老闆亦頭痕，最唔開心出品水準降，伙記嘴藐藐趕客，被激到生蝦咁跳，亦不敢即炒，生怕更踢腳。

　　飮食行業服務欠佳，都拜人資短缺所賜。自從賭權開放後，賭場人工比普通行業高，吸引不少人投身博彩業，連阿嬸寧守賭場廁所，貪人工較高伙食好，也不願到食肆洗碗，形成衆多服務業缺人。老闆加薪留人少不免，但舖租、物價係咁升，成本大增，無論乘機抑或被迫都要加價，請唔到人時，寧暫停營業或摺埋，實行冇眼睇。

　　澳門賭場餐廳、食肆初期係威係勢，所請侍應高頭大馬，年靑貌美，多屬外僱。現時，不知是否規定要請本地人，抑或外僱比較內地還好世界，合約一滿，再唔吼斗來澳打工，故現時的侍應老化半截，無論醒目程度及服務質素均下降，出品亦甚普通，大打折扣。

　　賭場越開越多，澳門人手有限，難免要請外僱。那邊廂，政府要顧本地人就業，但某些本地人唔爭氣，未達標，加上有些企業縮骨寧請外僱，搞到政府左右做人難。死結難解，形成澳門長期有“病”，一味派錢只會越養越多攞着數懶人。為官者要認眞諗計矣，減少些剪綵“忙碌”時間，或許會度到好橋！

　　羅倫斯