日本係世界第三大經濟體，大災難過後，恢復元氣也需十年八載。勿以為受挫只是日本，與該國有投資、貿易關係的國家，亦受到不同程度影響，中國更是大戶，瓣瓣皆有，特別是汽車生產，某些厰無零件供應，肯定企硬。歐美不少國家同樣頭痕，可能要減產或裁員。
細小至澳門，除經營日本食物、家電、攝材等公司須密切留意情況，經營日本汽車銷售業者，更加緊與當地聯繫，事關災區車厰受地震破壞，又無足夠電力供應，機械人唔郁，唔通用人手製作乎。
與汽車業界朋友講起大地震，得悉日本三大車厰都受影響。總部在名古屋之豐田，岩手縣有生產線，仙台有設施；本田、日產若干厰房都在災區範圍，日產櫪木厰房更受破壞；萬事得總部在廣島，處日本南部，無受影響，但為安全理由，厰亦停頓
震災牽動日本全國，就算未受直接影響的其他日本車厰，間接亦受經濟損失，整個汽車行業都要過幾年緊日子。海外代理更難掌握情況，訂車暫時唔知幾時可交貨。
業界朋友話，現時要做的，仍是密切留意事態發展，靜候日本厰方就生產線、各項設施、人員評估，以及零件供應商等運作情況，短期內或有公佈。
受影響車厰就算恢復生產，仍需內外兼顧，旣要應付海外訂單，又要顧及內需，蓋因海嘯沖走無數車輛，水浸車早已報廢。
日本車厰一向重質量，出問題即回收改善，料災區車厰今後生產的汽車會仍有保障，唔會做壞招牌。澳門車市一月至今幾好景，可能較早前車牌靚，仍有捧場客購車及訂車，個別顧客聲稱信得過，照樣等。
日本汽車業受重大打擊，歐洲車乘勢而起，短期內或搶去日本車若干銷售份額，加上近年歐洲車搶攻細車市場，價錢適中，與同級日本車售價差距縮短，日本車備受挑戰。不過，以日本人之聰明才智，縱然受災害挫折，但相信憑其毅力可打翻身仗，不需十八年後又一條好漢。
羅倫斯
