中超聯賽少觀衆 早應知恥近乎勇

    見報之日，世界盃剛名花有主，不管是西班牙抑或荷蘭，都係歷史性首奪冠軍，可喜可賀。

    世盃舉行時，期待巴西與西班牙爭冠軍，惟鬥牛勇士殺入決賽，巴西唔爭氣，令球迷錯失睇最高之技術較量。不過，荷蘭也不弱，這支黑馬闖入決賽，若奪標亦非偶然，畢竟係今屆世盃唯一全勝隊伍。

    早就喜歡西班牙，主要係巴塞羅那擁躉，喜歡技術型球隊，視為享受。西班牙陣中擁有七名巴塞球員（包括新加盟的前華倫西亞射手維拉），成條巴塞脊椎，其他球員亦似巴塞風格，唔捧佢，捧邊隊？

    對巴塞有好感，亦係到過此古城時留下深刻印象，不少建築充滿藝術氣息，參觀過當地大球場，睇過若干奧運設施，總覺西班牙唔止鬥牛咁簡單。就講打網球，新一哥拿度係好多人嘅Idol，在下欣賞其球技，力量加鬥志、速度，一流水準。

    講各地聯賽，英超最好睇，快速刺激，老早駁了有線睇球賽；論技術性，西甲仲好波，單睇巴塞美斯個人球技，足令波迷陶醉。可惜美斯今屆世盃缺少隊友配合，演出欠理想，未能趁世盃升上球王境界，可惜。

    希望西班牙奪標，目的係想西甲更好睇，皆因凡捧盃國家，球會多會大搞，肯落本買好球員，班底升呢，比賽會更精彩。

    荷蘭奪標，一樣高興。以前好欣賞荷蘭十上十落全能足球打法，荷蘭球王吿魯夫便是我輩細路年代的偶像。後來的荷蘭三劍俠古列治、雲巴士頓及列卡度，亦風靡不少球迷，朗奴高文更是出色重炮手，可惜荷蘭黃金時期未能抓住機遇，只得二奶命，難破宿命論。後期人手稍遜，有前冇後，打死罷就，打法令其一沉不起，至今屆始露生機。

    日前世盃休戰，百無聊賴下睇了半場中超，由北京國安對遼寧宏遠，睇過世界級球隊水平，再睇番亞洲二三流球賽，的確大打折扣。不過亦有驚喜，兩隊表現不差，略有進取。近年中超死氣沉沉，此仗偌大的工人體育場甚多空位，可見不少球迷已對中國足球死心，有中超聯賽之名，毫無超級水平之實，甚至是超渣，曾見有職業球員開角球甚鬼鼠，竟兩次將球推前三呎開，醜態百出，球證闊佬懶理，球迷又怎會再入球場呢？中國球員、國足應要知恥近乎勇矣！