世盃勁旅多窒縮

    輸波或煲魚生粥

    澳人歷來最有福

    場場免費睇到足

    世界盃球隊第一輪全部亮相，大部分球隊縮窒，表現平平，全無驚喜，令波迷、車迷大失所望。

    先講巴西，球員質素無可置疑，但對朝鮮緊迫密集竟如老鼠拉龜，全無霸氣，進攻瓣數不多，森巴足球打唔響，倘遇更硬橋硬馬技術型球隊，要贏非易。想爭冠軍，仍須努力。今時今日巴西隊，已無昔日輝煌，球迷再搵唔番以前嘅巴西，不過仍有料，可續追捧。

    西班牙係波迷心儀球隊，腳下功夫出衆，惟件頭稍遜，一遇緊迫，無計可施，好睇唔好食，被瑞士悶死，就等於巴塞被國米打殘一樣，瀟灑未必永恆。

    德國行軍快速，積極進取，亦算醒神，輸畀塞爾維亞，欠運失機，幾無厘頭；阿根廷對辦，漸入佳境，美斯成各隊心腹大患，相信重要戰役會有入球；荷蘭以攻為守，啱球迷口味，但無大賽命，冀能打破宿命論。英國乏善足陳，意大利不過不失，表現總比褪色法國好。

    非洲球隊與歐美勁旅差距縮短；亞洲球隊韓國、朝鮮、日本都有好表現，但比賽要多花人家一倍氣力，皆因體型輸蝕，技術有差距。

    歷屆世界盃，勁旅第一輪都不會去盡，想睇好波，十六強淘汰賽才見眞章。

    講眞，就算世界盃頂班球隊，也未必如曼聯、車路士、巴塞、皇馬、國米實力強，大球會集各地精英，長期夾慣，可觀性強，世界盃只不過國家觀念大於一切而已，未必精彩。

    睇世盃球賽，澳人有福，所有賽事即場睇到，還可揀台，最開心係無須畀錢。先進如鄰埠，某有線獲獨家播映權，另一冧巴溫電視台，播波只能講賽果，放硬照，入波過程要買公仔動畫，花費七位數字，非常搞笑，冇晒菲士。

    電視台講波，澳門旁述肯搜資料，做足功課，基本上做到中立、持平，業餘中邁向專業。想當年，“阿叔”林尙義講波由食螺絲至流水行雲，也有漸進過程，澳門勝在平時乜波都有得播，工多藝熟，現時個別旁述講到會飛，皆因球員出身睇得通，比起鄰埠評述不遑多讓。

    講波須到肉、生鬼，再加抑揚頓挫，才會吸引球迷，太平淡或鬼食泥，球迷半夜三更好易瞌眼瞓。作為嘉賓，適當時候發表偉論，切忌喧賓奪主。