旅遊巴直衝西灣湖，司機扭軚及時僅撞樹，冇墮湖，十八傷者無大礙，算是不幸中大幸。

　　有人話同牌子型號旅巴意外多，或許巧合吧，不能作準。多公司樂用，反映對牌子有信心。正如汽車專業維修技師所言，現今巴士煞車系統較舊式巴士更安全，加上當日路面有煞車痕，說明與旅巴煞車系統無關。

　　就算係頂班名牌巴士，若無定期保養，只靠每年驗車一次便認為可靠，那是自己呃自己，攞乘客較飛。這其中，司機是否對巴士性能有充分認識，技術是否過關；維修人員是否專業，反而成為安全的最大問題。

　　近年澳門飛速發展，賭業興旺，暴增不少發財車，大巴司機需求甚殷，經驗老到的司機當然冇問題，但有些新手或技術欠佳者，僱用公司未必似考牌官嚴考技術，在人資短缺下，主管請夠人便阿彌陀佛，管不得濫竽充數那麼多。如日前所見，一中巴由荷蘭園右轉高士德圖上天橋，但因街口重整下水道收窄，司機偸位遲而無法轉彎，阻礙交通，技術還差多少。

　　澳門近年增添頗多新旅巴，但亦見不少較殘旅巴行走街頭，一睇車身便知翻噴，加油還噴墨魚，有些車齡超過十年，可謂老牛破車，只不過在驗車前左維修、右補救，甚至幫襯街邊修車舖，冇去原厰檢測，總之過海便是神仙。業界有無諗過，出大件事時，要補救還勁過買一部幾十萬之旅遊車，被追究責任時，會搞到周身蟻。

　　當局推行公交優先，未來三家巴士公司同時營運，巴士必然增多，也需大量司機。早前已有新巴士公司稱人手不足，想請外勞，引起坊間及團體非議，指是縮骨唔請本地人。誰是誰非，暫且不論，市民最關心的問題，首要是乘車安全，如果遇着技術未精或唔熟路司機，日日係咁坐，唔驚有鬼。

　　外勞司機行慣右上左落，少走路窄車多之小城道路，也應適應一段時間才可上位。司機是否稱職，公司事前須清楚，正常應做足監管，定期驗車。作為政府，更應加強旅巴檢驗，蓋因旅巴不同其他機動車，一載人多，二車體大，有意外時會較普通私家車嚴重。但無論如何，任何車輛都應做足安全措施，畢竟生命比任何財產更重要。

　　羅倫斯