港加車稅一成半 交通擠塞望紓緩

　　澳門稅率亦非低 車價向比鄰埠貴

　　香港財爺大幅調高私家車首次登記稅百分之十五，即時生效，此為港府七年來首次向私家車車主開刀。

　　港府列數據振振有詞，香港去年汽車增幅較○九年升逾四成，達四萬一千輛，為九七年後新高，令私家車總數攀升至四十一萬五千輛，較上世紀八十年代多逾一倍。去年汽車增幅創下十年新高，增長明顯影響道路交通，稱有必要調高登記稅，遏止增勢，免道路繼續擠塞惡化，強調加稅非為增收，主要是解決塞車問題。

　　港府認為加稅可使更多人換環保車，因電動車可豁免首次登記稅，環保車亦獲寬減三成首次登記稅，兩大優惠繼續推行。港府話起帶頭作用，換車優先選購二百部不同類型電動車。

　　與香港行家談及加稅，得悉鄰埠原來私家車首次登記稅介乎百分之三十五至一百，日後將增至百分之四十至一百一十五。換言之，一部十五萬私家車，原來稅款五萬二千五，新稅要付六萬；階梯式徵稅，貴價車加幅唔講得笑。

　　港業界批評當局加幅太勁，令買車成本增加，各車行正匆忙調整售價，憂生意受打擊。事實證明，有買家得知消息後撻訂，有的準備簽約，當知道多付幾萬元稅，立即放棄。最慘係最近訂車者，唔好彩食正，唔知繼續去馬抑撻訂。有買家更攞命，本來早兩月買現貨，但多心揀色要等，遲個零月取車，無端端買貴貨，喊都無謂。

　　港府加稅一成半，對富戶而言，濕濕碎，唔會窒住買車換車。加稅只會難倒中下階層，特別是行業需要，非用車不可者，一是要買貴車，頂唔順變買二手車，原來的一批人繼續用車，對紓緩交通無大作用，反而理順交通更重要。

　　澳門或將有朝一日加車稅，藉以改善塞車。果如是，澳門冇香港咁傷，小城地方細，買貴車不如行路，或坐公交車輛，況且當局常講公交優先，希望唔會搞出大頭佛。目前澳門汽車登記稅為百分之三十至五十五之間，歷來買車都比香港稍貴，主要是多重運費；其次是香港總代理，澳門屬代理，梗要畀些佣。將來如果加車稅，最傷者，始終都係用家同車行，後者生意必受影響，除非澳門持續好景，那又另當別論。

　　羅倫斯