除夕狂歡唔怕夜

　　年初一開直通車

　　假期無休畀三工

　　新春搵食到處貢

　　兔年開工大吉，恭祝各位新一年動若脫兔，生龍活虎。

　　年卅晩人車逼爆中區，仿似全城人出來趁熱鬧，新馬路、媽閣一帶行車緩慢，但無人會響安，皆因人人心情靚，塞車亦覺過癮。年初一早上則大相逕庭，高士德、雅廉訪一帶水靜鵝飛，揸車直通，連人都特少，相信不少後生仔女玩通頂，仍在元龍高臥。

　　澳門是個移民城市，近廿年多內地人移居本澳，但老家仍有根，每年春節，紛紛一家大細回鄕團聚，故農曆新年前，不少新舊移民“田雞過河各自撑”。與此同時，有人喜歡旅行避年，近年經濟好轉，政府有幾千銀送，用去旅行好過亂花或進貢賭場。

　　新春假期，開工畀三工，不少中小、微型食肆做埋唔夠畀，索性新年休息。幸好澳門食肆多，儘管搵食難，亦可行多幾步，但想嗰間，未必有位，迫住無甚要求，但求有定落腳便算。北區部分食肆由新舊移民開設，亦要返鄕，休息無所謂。不少伙記性質一樣，就算畀三工，阿叔定要返鄕過年，人資缺乏，唔怕被炒，老細冇法子新年唔休。要食好嘢，當然唔愁，賭場內多高級食肆，有錢乜都得，是否値得，則見仁見智。

　　有小朋友的家庭，新春可能較辛苦，若是家中請的是本地女傭，很多人會返鄕度歲，一去四至七日，甚至十日八日，戶主顧細路，又要做家頭細務，洗衫尙有洗衣機幫忙，食飯唔煮可出外祭肚或打包，但換石油氣之類，有戶主亦唔識，要致電問人，幾乎冇熱水沖涼。

　　請本地女傭好重要，起碼餸菜啱口味，有啖好湯飮，若轉請印越菲傭，始終唔習慣。故而本地女傭新年休假，戶主都唔會窒頭窒勢，除非係惡僱主。

　　的士大佬新年又點？吾友話埋年生意一般，早上較靜，排氹仔某賭場，等成半粒鐘，到有客，唉，佢話去官也街食飯，咁短程，亦冇計。皆因埋年少內地客，可能準備在內地過年。至年卅晩，家家戶戶出街逛，或去上香，生意係有，但亦塞車冇肉食。初一街頭生意唔見大旺，反而晩上去賭場發新年財者多，排賭場線甚快。初三、初四內地客湧至，賭場墟冚，的士好生意，算係咁矣。

　　一年之計在於春，希望經濟持續發展，各業興旺，打工仔加人工，健健康康齊搵錢！

　　羅倫斯