洗車望天

　　又到一年將盡。翻開日曆，今天已是年廿八，亦係“洗邋遢”之時。每逢年尾，行行都忙，最忙者之一要數車行。中國人傳統喜歡買新野過新年，新衫、新鞋、甚至新屋、新車，故裝修行近年尾也忙到飛起。至於經濟好景，居民收入改善，但樓價急升買不起，先出架新車，為數不少也，故買新車過新年成為定律，車行例牌忙。

　　不過，今年新車銷量有所下滑，皆因政府收緊政策，增加養車成本。車行中人冀望金兔來臨，橫琴開放予澳門車輛自由進出，拓寬行車空間；同時政府能大力汰除殘舊和廢氣車輛，減少路面負荷，令本澳車市健康發展。

　　挨年近晩，另一大忙行業與“洗邋遢”有關，就是洗車行業，無人不想座駕光光鮮鮮過新年！近年尾的一個星期，洗車大旺，做到氣咳，看看小小澳門近二十萬輛汽車，排除電單車，私家車也有十萬之數，四分一往洗車也不得了！

　　正如洗車行業老友曰，“通街都係車，唔憂冇生意。”最憂者係天氣和人資。天氣對洗車行業影響立竿見影，雨天一定拍烏蠅，無人洗車後畀雨淋；連續多日乾燥天氣，會做到做唔切。至於人資，老友只有長嘆。其洗車公司已用電腦洗車，雖然大部分工序全自動，但抹乾、打蠟仍要不少人手，“本地人邊個願意做洗車仔？輸勞又話非技術勞工……”現在有野做，但冇人手，如蜑家雞見水，無奈！

　　斯  雨