美副將車冇時停 途人過路定要醒

　　危機四伏髮夾彎 上斜無燈易撞板

　　吾友搬家，移師北區，返工則在中區，傍晩放工回家，感覺比前更遲歸家，皆因塞車所致。

　　吾友每日揸車駛經高士德，再轉上俾利喇街準備入北區，很多時連入俾利喇街機會也沒有。何解？原因係雅廉訪與俾利喇街交界設置紅綠燈，繁忙時間行車緩慢，要排車龍，唯有兜路走。

　　吾友話嬲起上來，索性早些行路返工，之不過同樣激氣。

　　佢話傍晩放工行至俾利喇街與美副將交界，過馬路非常困難，左方、前方車輛係咁衝，冇時停，而且速度快，行慢些過路，分分鐘被車撞倒。就算直路冇來車，行到路中心，又要提防從北區駛來的車輛轉入美副將。對後生仔女而言，眼明腳快還可應付，但對老人家，便顯得寸步難行，至於失明人士過路，更是危機四伏。

　　吾友話，此處裝有紅綠燈，但又無開啟，唔知裝來做乜。

　　當局在此裝交通燈，當然有其作用，目的疏導交通。目前高士德鋪下水道，不少巴士線移雅廉訪及美副將，無疑加重附近一帶交通負荷，故有必要加裝交通燈疏通。問題是，澳門行車道路有限，車輛卻無限制增多，就算交通警有三頭六臂也難疏導，等於十個埕得九個蓋，左冚右冚，始終冚唔晒。

　　目前俾利喇街與雅廉訪繁忙時間紅綠燈前大塞車，當局都會睇定，不會貿然開啟雅廉訪與賈伯樂及俾利喇街與美副將的紅綠燈，生怕塞上加塞。

　　早前有人話，俾利喇街與雅廉訪裝紅綠燈好，方便行人過馬路。不過，照觀察，行人過路綠燈等得太久，不少人按捺不住，紅燈照過，有時亦造成人車爭路。路人唔守規矩，主要等得太耐，難怪喉急者照衝。如可能的話，有關方面應予調整，但看來都係冇辦法居多。

　　吾友話，有時高士德一帶塞車迫住走漁翁街，但髮夾彎卻潛伏危機，轉彎前見斜路頂睹後鏡無車上，但甫一轉彎，車身便有車殺至，原來有些車輛入夜冇開燈。有交通警在場疏導時，秩序則有改善。

　　有雅廉訪住戶表示，現時駕車返家入停車場，只有一條路較順暢，但亦要等紅綠燈，若走其他反方向路返家，便要左兜右兜，兜一大輪，比前嘥時間，冇計！

　　羅倫斯