汽車音響開到盡  立例管制免擾人

    花旗國親戚來澳探親，感覺本地鐵馬得人驚，成群呼嘯而來，斑馬線前如狼似虎，個別毫不讓人，有些則在汽車旁左穿右揷，睇見牙煙，坦言不敢在澳揸車。

    很多外地朋友有同感，見到群馬均怕怕。本澳駕駛者，無論是揸四個轆抑或兩個轆，大多不為以甚，皆因習慣成自然。在車多路窄繁忙街道，汽車若開快，撞板多過食飯，只能按正常線路行駛，預咗鐵馬爬頭，無謂爭先。但在通衢大道或大橋行走，汽車馬力大，普通綿羊多食塵，騎士有所顧忌，會縮埋左邊，事關人包鐵，正常者唔會咁傻同人鬥。

    歷年積累經驗，當揸汽車到街口時，都會留意旁邊有無電單車，如果有，會讓其先行，原因是很多初哥或大膽殺手安全意識薄弱，通常會在汽車前頭繞過，吹佢唔脹，如果唔讓，將之鏟低，贏晒都係慘勝。

    其實乜都講適應，閣下若到花旗國揸車，初時或會騰雞，主要人生路不熟，高速公路車速快，越線觸目驚心，有親朋在旁指引，則勝過衛星導航。由於車速高，一般行車都保持一定距離，不似澳門車跟得較貼。

    澳門有樣“特色”，在外地鬧市難以見到（或許撞唔正），此乃汽車音響噪音。澳門正修訂噪音法，卻未見汽車音響擾人列違法。街上時有年輕人開大汽車音響，勁到拆天，專在鬧市行走，頗乞人憎，自己過癮，卻不知途人在駡。

    改裝死氣大聲扮賽車，警方會檢控，但汽車音響勁開，搞到成街變Disco，街警只會眼斬斬，無干涉，明知聲浪擾人，可能唔知用乜例“差廚”。

    警方近月帶新人學指揮交通或查車，此乃實習，若被查中，過程或耐些，閣下勿覺煩。查車旨在打擊犯罪，警民合作好應該。不過有人反映，查車乜都畀晒驗，但有警員竟問車主叫乜名。明明駕照上有中文名字，若非文盲，就係法國大餐多舊魚，惹人反感。

    在下亦被查過車，不少警員很有禮貌（或許上頭規定），唔該在前，亦唔該在後，如祖國同胞話齋，係文明查車。至於煩倒車主，應屬個別事件，只要執法者無濫權，不涉侵犯人權，何必計較。“金無足赤，人無完人”，包容共濟，乜事都冇，最緊要無行差踏錯！