企理茶居難尋覓 養在深閨人未識

    飮食節目受歡迎 大讚小彈顯效應

    央視有個煞食節目《小崔說事》，吾友崔則慣“小崔說食”，鑽窿鑽罅，又畀佢搵到一處隱蔽茶居，幾好味，又抵食。

    店處北區，話隱蔽，對中區人來說，幾難搵，尤其是揸車；北區街坊亦未必搵到，皆因北到尾，而且在橫街，難怪開店兩月餘，似乎“養在深閨人未識”。

    其實好易搵，只要睇到關閘麥當勞，從橫街直行百多米即現眼前。店名寳發，早午茶晩飯宵夜，中菜豐儉由人，點心大衆化，砌到凌晨三點。附近街坊當然知頭知路，不少已成常客。

    寳發搞手乃酒家大廚，小菜有幾手，連最普通椒鹽九肚做到乾身入味，一絕。車王建更識飮識食到處貢，吹雞開餐冇是非，五人幫加少壯派，齊齊支持中小企，街坊小菜，車天車地又一餐。

    民以食為天，公仔箱多講飮講食節目，頗受歡迎。澳門近年地位提升，吸引不少海內外電視台來澳做美食節目，公仔箱介紹過後，即有宣傳效應，受訪食店大多旺一輪，甚至轉大運。報紙、雜誌亦一樣，搞到不少食店貼滿飮食名人、藝員與老板合照，以收引客之效。

    呢個世界係互相利用，拍飮食、寫飮食之人，總要搵採訪對象，始能賣片、交差或搵稿費，屬主動利用；食肆借名人、藝員名氣宣傳，屬被動利用，但對己有利，有人搵，Lur飯應。然而世事無絕對，“你話拍就拍，咁咪好冇面”，有些食肆怕煩，拒絕受訪，即如有位過日辰之土生餐老板，就請大姐大食閉門羹。

    飮食名人多屬老江湖，拍片識做，食乜有乜味，大讚小彈，或樣樣讚，大家Happy，食店會當佢老竇咁拜。大姐大慣世面，有時心直口快，無意倒米，卻有檔販幾乎要攞掘頭掃把。

    類似飮食名人，見識廣博，任何高低層次都去到，什麼好嘢都食過。但講炮製，都係邊做邊學，幕後聽廚房大佬點講，幕前照噏當係自己嘢，實則是廚佬心得。有時自由發揮講錯，廚佬陰陰笑，但又唔敢笑出聲。

    有食肆現身公仔箱後，生意突增，趁機加價；有舖頭人手少，生意做唔切，變咗催命符，頂唔順要休息三兩日；有些客多忙應付，反變出品質量差。不少本地食客熬熬聲，怨收貴咗兼水準降！

    羅倫斯