酒逢知己千杯少 攞苦來辛冇必要

　　朋友半夜油站入油，見靑年甫落的士，即求油站阿姐幫手洗的士，人工兩舊水。

　　清洗的士，油站常見，唔係司機洗就係畀人抹，點解靑年咁好心，出錢替司機洗車？

　　唔使問阿貴，梗係劏白鶴。冇耐，朋友見司機落車，即同靑年講，“洗車又點，冇得做生意，點計先？”靑年自知理虧，唯有科水補償。

　　不旋踵，朋友見靑年從的士攙扶另一人落車，原來此人才是白鶴弟子，嘔到腳浮浮，變駝仔，要到油站廁所放飛劍。

　　的士門打開，嘔吐酸餿味飄送，中人欲嘔。朋友剛入好油，連忙撻車關窗開冷氣，走之哉。

　　近年當局嚴打醉駕，停牌罰款，屢犯踎監，但仍有好酒之徒以身試法，交警週五、週六捉唔少，醉駕撞車者更走唔甩。停牌對駕駛者來說，冇車摣，如自斷一臂，好痛苦。

　　酒友為免惹官非，酒後打的返屋企，做個好公民。初期的士大佬照載，久而久之，則深宵避往酒吧區，原因領嘢多，學精咗。

　　有相熟的士阿叔話，曾有酒客在的士嘔吐，搞到汙糟邋遢，臭氣薰天，幾日唚味仍難清。有同行載住班惡人，車上嘔吐當冇件事，講聲唔好意思已畀面，要佢畀錢洗車，膝頭對上就係髀。亦有司機載過醉酒佬，雖冇嘔吐，卻語無倫次，甚至喊打喊殺，打司機也曾發生過。

　　的士阿叔話，有次途經 場被數潮青截車，走唔甩，醉酒仔車上作欲嘔狀，扯蝦聲聽到心寒，幸而大步檻過。現時盡量避免深宵經酒吧區，免惹麻煩。

　　對酒當歌，人生幾何。一周辛勞，假日與友飮番杯，車天車地，大可鬆弛神經。酒可促進血液循環，適量有益。然而，不少酒友經常飮大飮high，甚至當水飮，一晩隊幾支，好易傷脾胃，飮到肝硬化。

　　朋友之中，亦有人飮冧，由鄰地抬返澳門急救。佢話飮到記憶力衰退，可能傷及腦細胞，又冇胃口，從此怕怕。

　　“酒逢知己千杯少”，詩人墨客誇張慣，不過間中放肆，無可厚非。人在江湖，應酬難免，但須量力而為，畢竟酒乃穿腸物，人出酒，你出命，好酒量非經常好狀態，日積月累，酒神也會一朝崩潰，衰咗，鬼可憐！

　　羅倫斯