動車為何會撞尾 追查原因莫迴避

羅倫斯

    動車為何會撞尾 追查原因莫迴避

    國力增強惹人忌 發財立品要爭氣

    溫州動車追尾大災難，睇電視，甚悲情。

    茶檔友儕話，追求速度，若無安全保障，如此世界第一，唔攞就罷。當局應徹查出事原因，防類似慘劇再發生，使公衆對高鐵回復信心，更應追查有否涉及貪腐與瀆職。

    講起貪腐，口痕友咬牙切齒，勁數內地貪官離譜劣行，當晒係第一手資料。

    內地貪腐籠統分為三時期，早期送大禮，中期房地產，近期高科技。貪污由小到大，由個人擴至群集性。

    早年想升官，得賄賂有力上司，用錢買官位，甚普遍；高有高貪，低有低貪，口痕友話鎭仔山高皇帝遠，更易貪。佢聽家務助理講，某鎭阿頭家居超豪，N年前已過百萬裝修。有承包戶想續約包地耕種，都要進貢芝麻綠豆小幹部，阿頭唔知有鬼，實際大小通吃，一條龍貪污。

    官員貪污成風，官場人人皆知，當局嚴打亦冇符，貪污勢力大，春風吹又生。有人做官目的皆為貪，就算初時係清官，有建樹，做做吓，發覺原來無人監管，唔搵水，好戇居。貪官財源滾滾，洗錢一流，贓款轉外地。長期以權謀私，愈貪愈大，錢多了，生活趨腐化，飽暖思淫慾，包二奶，養情婦，已是等閒事。

    講到起，有茶客冇搭台，亦搭嘴，話貪官亦係淫官，霸佔人妻，竟花千萬養情婦，有淫官包一百四十情婦，分配不匀惹爭風呷醋。不少淫官被揭，都是情婦舉報，落得身敗名裂判死刑下場。

    改革開放令國力增強，人民生活改善，顯見路線正確，但貧富懸殊，卻衍生社會矛盾，不少人只向錢看，扭曲價値觀，這牽涉到整個敎育問題。現時有些大款細款發財唔立品，特別到外地旅遊，財大氣粗，自大成性，形同井蛙，旣無品，亦缺德，惹人反感。鑑於歐美現債務危機，不少晒財之內地遊客，便成為被搶劫對象，誰叫你裝成好像全世界最有錢就係中國人。

    畢竟十六、七億人，難免樹大有枯枝，強化法治，肅貪倡廉，加強敎育，是目前最需要的三大瓣，中國人眞的要爭氣。

    羅倫斯