歲晩買車過新年 流動紅牌通街見

　　車行銷售客流增 撒網打盡年輕人

　　呢排凍到狗縮貓又縮，人更思思縮縮，減少周圍酺，夜寧家中龜縮。全球暖化，突遇強冷空氣變反常，凍期之長，近年少見。

　　年關在即，縱使天寒地凍，小市民為搵兩餐，唔到你縮，鬼叫你窮頂硬上。但無論富或貧，歲晩都須埋年結，甚至趕工，彼此希望搵水過肥年。做生意者，更須最後衝刺，此時不搵更待何時。

　　打工仔，年尾出雙糧，有些又有花紅分，計條數，有盈餘，便肯花大錢，買年貨，置新車，開開心心過新年。

　　經濟好轉，人人有工做，自然消費增，但年來通脹厲害，物價飛漲，亦打窒不少市民購物慾。但無論如何，搵到錢者仍大有人在，近排街上紅牌車增多，連居所停車場亦多了幾架新牌仔，有些貴價車，可知住客幾有景。

　　年前金融海嘯，搞到車行冇乜肉食，復甦期追回多少，去年不少車行已收復失地，個別甚至大豐收。進入新一年，車行乘勝追擊，繼聖誕優惠後，歲晩再斬多四両，務求做多一筆，交成績表多幾個A。

　　澳門近年發展快，熱錢從各處飛來，樣樣炒貴，住宅、舖位、車位貴到飛起，有錢佬似突然增多，五六十萬至過百萬名車通街見，連香港車評老友話澳門乜靚車都有，仲話七人車特多。

　　冇錯，澳門的確多咗七人車，貴價者，賭場、賭廳及大企業、大公司買來接客；一般七人車與二千CC價錢相若，但可坐多兩人，頗受普羅大衆歡迎，七人車成近年熱門車種。

　　現今買車者，多了不少年輕人，八十尾、九十後都能打到萬零或兩萬文工，雖難買樓，但有能力供車，故車行做多這類人生意，型車頗受歡迎。現代年輕人與昔日的不一樣，打工一年半載，可以辭工去旅行，玩夠使盡，又再搵工，唔知事業心為何物，認眞世界變。不少富二代年紀輕輕揸名車，專在白馬行等人多地方晒冷，甚至開大音響招搖過市，皆因老竇大把，吹咩！

　　歲晩有人趕買車，不奇怪，舊年則多人過了年才買車。時代在不斷轉變中，車行亦加強宣傳，希望任何時候都係旺季。

　　但願經濟幾時都咁好！

　　羅倫斯