迫巴不成去打的 街中呆等搵氣激

　　天寒地凍駕者衆 雅廉訪路排車龍

　　某日行至高士德富華附近，有內地客問去某地乘幾路車。冇搭巴士久矣，只識五號線，被問到口啞，唯有講聲對不起，建議對方問車站乘客。

　　有時很想安步當車，但因上班趕時間，無車不行。巴士非不想搭，有些車站還在家門口，睇到車站路線圖密麻麻，就無心機慢慢睇，明明想搭巴士變打的，不過有時等餐懵，遇到冇品的士司機，仲激氣。

　　現時高士德巴士線移至雅廉訪及美副將，更加矇查查。今時今日坐巴士，睇見車站堆人已怕怕，有時擺明迫巴士而非坐巴士，儘管依家搭巴士夠抵。

　　巴士線改行雅廉訪及美副將，無疑加重道路壓力，當局在雅廉訪與俾利喇街交界設置紅綠燈，使車輛有序行進，唔使街口打困龍，路人亦可安全過路。然而針無兩頭利，經觀察，由於車流量增加，又有紅綠燈規管，傍晩繁忙時間，雅廉訪大排車龍，從高士德想轉高地烏街或入雅廉訪，成條車龍塞滿麥當勞街口，動彈不得，其他車輛迫轉另一街口。

　　那邊廂，高士德車輛想轉上俾利喇街去北區，亦係塞在大西洋銀行門前，車輛無法轉入，又要走頭。

　　平日落雨，用車者衆，各區主要路段必大塞，高士德、雅廉訪一帶更不例外。近日天寒地凍，又有微雨，揸車者更多，雅廉訪與俾利喇街口紅綠燈後大排車龍，綠燈行車只通過四、五架，車主又要呆等。有唔生性車主在雅廉訪上路停車等人或傾電話，阻了一條行車線，隨後車輛難以切線，迫住搏命響安，聲浪響過老人院平安鐘，搞到成街鬼殺咁嘈；唔好老脾者，還擰轉頭怒視阻街者，有些更媽媽聲。雅廉訪與賈伯樂十字路口，車輛時打困龍，有等駕駛者打茅波，塞在路口中，變成全線大塞車。此處裝有紅綠燈，一直未開過，不過唔開好過開，實則咁短距離無此必要設燈組。

　　目前高士德重整只完成紅街市段，若動到要害路段，塞車更嚴重，屆時交警就算有三頭六臂，唔用紅綠燈又再吹雞，也難緩解大塞車，神仙也難救，駕駛者須忍讓矣！

　　羅倫斯