茶客衣衫似受罪

    爛賭習性見不怪

    賭場禁煙亦冇壞

    坐友人車，感覺車廂有煙味，問是否呑雲吐霧抽過煙。友稱個幾鐘頭前吸過，而且有開窗，佢話感覺唔到，但我等無煙一族嗅覺對煙特別敏感。

    幫襯茶檔，散Band後衣衫一陣除，當時茶客不算多，看來煙草味眞可入肉，吸入體內等同慢性自殺，對身體有害無益。現代樓宇渠管通氣無大改善，樓上去完廁記，樓下或聞到煙味，好慘！難怪有些人一世無煙亦患肺癌，就拜二手煙所賜。

    政府禁煙法案新版本建議，娛樂場三年過渡期後須全面禁煙，再無豁免。大多博彩從業員對此舉腳贊成，蓋因長期在硝煙瀰漫環境下工作，就算自己係煙民，亦感覺難保金剛不壞身，更何況無吸煙者要長期忍受二手煙，日積月累，唔講得笑。

    賭場禁煙，會否影響生意？

    相信到過賭場娛樂或見識過的人士，都會睇到一些情況，就是半數賭客都吸煙。君不見賭檯經常煙霧迷漫，有時還勁過廬山雲霧，是故從不埋檯睇熱鬧。至於打老虎機者，則分賭或玩。賭者，目的贏大錢，有時注碼大，一晩輸十萬八萬閒閒哋。這些人，大多抽煙提神，特別是內地人，比港客更厲害，一支駁一支，冇時停，有時逼走隔離左右無煙客；玩者，屬小注怡情，預輸多贏少，旨在攞個彩，假期高興嚇。這些人，抽煙比例則較少。

    換言之，賭場他日禁煙，初期或會影響生意，亦令保安、職員一段時間會難做，但講深一層，賭仔習性始終爛賭，冇煙吸，至多流鼻水，食住戒煙糖，好過冇得賭。閣下亦不用擔心這些煙民因澳門禁煙而遠走拉斯維加斯搏殺，相信一般賭客無此本事，始終近水樓台，入同聲同氣賭場比外地賭場“易”搵錢。

    賭場禁煙，中場料無大影響，貴賓廳生意則可能有阻滯，蓋因大客財大氣粗，有些平日惡慣，輸錢發爛渣，贏錢肯打賞，此類“三更窮、五更富”賭客，或會流失一些。但環境好壞始終要看全球經濟，復甦快，賭場生意只會有升冇降，與禁煙無大關係。賭場最忌閂水喉，賭收下跌，影響稅收，會衍生若干問題，不過這些都是假設，賭場禁煙仍樂觀。