現代足球講實際

    花拳繡腿得個睇

    國米敎頭最多計

    巴塞超強卻勢危

    吾友旣車迷，亦球迷，呢輪校定鬧鐘夜睇歐冠盃，半睡半醒睇完場，唔似我等夜遊神，鬼打冇咁精神。

    大家都係捧巴塞，皆被準球王美斯吸引，對勁旅阿仙奴一役大四喜，腳法與射術之勁，現今僅皇馬C朗可比擬。

    睇巴塞，係享受，整體推進悅目，難覓類此球隊；睇美斯，更是球迷期待，過關斬將如入無人之境，足令擁躉心花怒放。

    很多球迷認為巴塞為當今王者，但現實強隊也有死穴，先前被國內聯賽愛斯賓奴打緊迫，處劣勢失分，已知這支強隊非無懈可擊，好睇冇用，最緊要踢球入網。

    在下亦捧國際米蘭，這隊波，無一球員特別喜愛，僅佩服隊長辛尼迪這位通天老倌。要捧的，就是那位攻於心計的敎練摩連奴。此公執敎波爾圖時，足可媲美現在的巴塞。上幾屆打歐冠盃，波爾圖大牌不算多，但推進爽朗，默契十足，針對性強，當年的中場球員迪高，就像一條源源不絕的輸血管，傳送與校炮，起到中場大腦作用，是其最顚峰時期。

    自此，就十分注視這位有料敎練，轉投車路士時，亦引領在下捧車路士，實際係睇摩連奴。其後執敎國米，此隊屬悶人波，打意大利聯賽，常同對手拉鋸，比賽雖贏，卻僅一球煲魚生粥，令人不想多睇無甚刺激的意大利波。

    打歐冠盃，摩連奴可令這支食滯球隊突然生猛，全是戰術運用得宜。打車路士，竟可打散其強大中場，令前鋒冇啖好食，擊退對手，絕非付碌。

    曾想過國米會悶死巴塞，勢估唔到係用對攻打垮對手，全場凍結美斯，切斷沙維大動脈，令對手埋門乏力，緊迫戰術演繹成功。

    巴塞、國米在各自聯賽中一路領先群雄，中段抛開其他球隊，孰料近季尾，巴塞被皇馬追近，國米被羅馬反超，又證明一樣，驕兵或鬥志鬆懈、韌力不足，都會遭遇滑鐵盧，事關現代足球，強隊與稍次球隊對碰，差距很少，尤其是打吡戰，同五五波無大分別。

    個人希望巴塞次回合反勝國米，拜仁慕尼黑再挫里昂，那麼，歐冠盃決鬥更有睇頭。相反國米對里昂，相信很多球迷興趣大減矣。