昔日牌坊玩踢波 腳頭失靈執到傻

    茨林改造非艱難 如無魄力徒空談

    昔日茨林圍居民家境清貧，餐搵餐食餐餐清，與其他區份貧苦大衆一樣，都係自救自，撑起成頭家，那有現代人動輒伸手等救濟，攞盡政府福利。

    茨林子弟童年生活，多非好過，畢竟細路，好動難免，做手作幫補家計之餘，見縫揷針，偸雞放紙鳶、打波子、拍公仔紙、轆錢牛、轆鐵圈、跳橡筋繩等，苦中取樂。最精彩者，莫過於上牌坊踢波。

    幾十年前，遊客多來自鄰埠，外國遊客少，牌坊空蕩蕩，石級對上平台可踢波，孩童過足癮，一旦腳頭失靈，踢過對面崇義學校或戀愛巷，又或踢落牌坊腳，執餐懵。牌坊有三道鐵門，街坊稱之“三隻眼”，舊日中門大開，兩側緊閉，有街坊愛在此打牙骹，風涼水冷。

    牌坊平台以前有人賣武走江湖，賣藝人赤膊上陣演氣硬功，鐵板條打完心口打背脊，由直打到彎，再由彎打返直，傷痕累累，睇到心寒，為的是賣跌打藥油，可謂搵食艱難。

    亦有醬園舖阿叔在牌坊平台曬涼果或瓜子，冇市政部門干涉，有阿叔在，孩童掃興，皆因冇得踢波。

    圍內街坊童年往事講不完，移居香港、外地或搬離的舊街坊，間中亦會落茨林圍探訪，了解圍內人和事變化，很有人情味。仍在茨林圍居住的老街坊，對家園不離不棄，不少人無意他遷。

    保育茨林圍，當局宜作首要考量，大可重塑圍村舊貌，營造文俗文化村特色，或引文化創意產業，延伸牌坊世遺景區，吸引遊客。

    茨林圍要發展，方案多，例如拆村屋，園底建旅遊巴、私家車、電單車停車場，頂部與高園街拉成平面，建空中休憩花園，團客可在停車場乘扶手電梯往牌坊觀光。至於停車場出入口，可打通新勝街。拆村屋，當然要做足合理補償或安置，政府須愼重處理。

    講實際又得，可在茨林圍建低層經社屋，營造令遊客也感羨慕的經典模範村，又可緩解住屋難問題。

    現時牌坊石級遊客滿瀉，四座公務員宿舍正拆卸，未來可分流遊客。至於改造茨林圍，十畫只有一撇，若照過往“船頭驚鬼，船尾驚賊”之蝸步行動，相信羅倫斯等到眞鬚假牙之年，亦未必睇到！

    （滄桑牌坊茨林情·下） 

    羅倫斯