買車容易樓難望
後生兩頭唔到岸
工程頻開人缺乏
家居裝修要畀凸
世侄築愛巢，置新居，所購易手樓，呎價非便宜，惟尙算負擔得起。若買新樓，可能要孭成世。
現時大多後生仔，買新樓，冇本事，買車則可以，十零廿萬供得起。至於成家立室住邊，一係租，一係跟父母做孝順仔，無選擇餘地。事關有些五、六層高舊樓亦過百萬，怎會甘心住物非所値之樓？
弱勢、低收還可以申請社屋、居屋，收入“高不成低不就”者，包括中產人士，變成條丢fing，冇資格申請，成為官老爺所言之“自由市場經濟”而不採措施調控的受害者，難免有怨氣。
有條件買樓而非大富大貴者，裝修要打因住波，皆因近年物價飛漲，衣食住行樣樣貴。今年裝修工人加薪，日薪加至七百五，家居裝修單畀人工夠和味，計埋設計及材料，幾十萬元閒閒哋；要豪裝，百萬冇走雞。現今十餘萬裝修，根本“冇嘢睇”。當局年來打擊黑工，保障本地工人就業，儘管仍有漏網之魚，但亦起到若干阻嚇作用。目前本地工人買少見少，後生仔怕辛苦，打死唔願入行，現有工人，大多是年過四十以上人士，大部分為新移民。
今年不少工程上馬，需大量工人，料扯走裝修工人，故家居裝修人手短缺，裝修住家勢必拖拖吓。有住戶反映，有些本地裝修公司所請工人乃港人，做三兩日又鬆人，斷估係黑工。
物以罕為貴，人亦係一樣，裝修工缺乏，必然加人工，住戶家居裝修要有心理準備。若然有需要，幾貴都要啃。
澳門家居裝修材料，大部分來自內地，比來路貨便宜得多，本來成本較輕，但現時珠三角工人亦缺乏，人工材料也在加，何解？
珠三角物資豐富，過去不少外省民工湧到廣州、珠海、中山一帶打工，死慳死抵，養活家鄕一家幾口，甚至返鄕可起樓。惟近年長三角發展更勁，江浙一帶工程更多，搶走大量民工，外省民工不再捨近圖遠到珠三角。
澳門樓價跟風香港，鄰埠環境轉好時，炒家就來澳門“搞搞震”，炒貴樓價。不過，港府興建公屋有規劃，不少弱勢及新移民早已上樓，只是有些人仍人心冇厭足。
羅倫斯
