點解澳門咁吸引或許賭仔想掘金

    呃人風水靠得住斷估豬乸會上樹

    有人問，金融海嘯對澳有無影響？

    答案有，不過對澳整體無大影響。

    唔信？閣下得閒可逛大三巴，總會見到人頭湧湧，周六日還逼爆手信街，遊客想在牌坊影番張單人照，難矣，事關總有大量“親戚”在左近。

    又唔信？閣下可到港澳碼頭瞄瞄，同樣客流穿梭，旅遊車泊滿賽車中心一帶。搭船過香港，賦歸客頗衆；由港乘船回澳，咪以為非繁忙時間少人搭，來吓一個又一個，成船瞬間Full house，想提早落船，後補無保障。

    再唔信，閣下可到珠海食晩飯，回程時在拱北等出關，會見人山人海，逼滿很多來澳內地人，唔到你唔信。

    世界輪流轉，以前多人偸渡來澳，自從開放自由行後，“有心人”唔駛冒險坐艇或游水，偸渡絕跡一時。不過年來偸渡頻仍，有些不受歡迎人物，或逾居者、風塵女郞被遣走，短期難申請，為求來澳掘金，不惜坐艇偸渡，花四五千文，又可從灣仔落船，媽閣上岸。更奇者，有人竟從澳門偸渡返內地，認眞世界變。偸渡者多有前科，被遣走又偸渡來澳，近日想回鄕度歲，故又調轉頭偸渡。

    點解澳門咁吸引？唔係小城列世遺，而係“賭”字夠“巴閉”。中國人習性好賭，多屬大賭亂性而非怡情嗰隻，內地禁賭，澳門多賭，唔趁遊澳“發財”勢係假！昔日博彩業靠港客，現時已為內地人取代，賭收節節上升。

    賭場越開越多，由港乘船返澳，特多賭嘢聽，賭客講賭，樂此不疲；船上早前又播某某新場開幕，只要上岸行三分鐘即到門口，唔駛坐車過馬路；近期搭客又獲派某賭場抽奬卡，到賭場抽中奬，可獲免費酒店房。

    賭場為吸引賭客，各出奇招，話幾百萬、幾千萬等人攞，噱頭多多。

    咁大隻蛤乸隨街跳？如果係，全世界都冇人做工，以賭為生矣！實際贏者只屬少數，賭場始終是大贏家。

    人心冇厭足，爛賭亦冇偈，最緊要量力而為，衰自己，勿累人，勿作奸犯科，更勿效法爭千億做假，事關天地有正氣，風水佬呃人十年八年，若然靠得住，豬乸都會上樹。

    “時窮節乃見，一一垂丹靑”，領悟文天祥《正氣歌》，吸納浩然之氣，不卑不亢，永遠是贏家！